Гісторыя стрыптызёркі і сына расійскага алігарха. Чым цікавы фільм, які атрымаў сёлета «Оскара»?
У стужцы зняліся расійскі акцёр, які раней граў капітана НКВД, і дзве беларускі.
Фаварытам прэміі «Оскар» гэтага года стаў фільм «Анора» амерыканскага рэжысёра Шона Бэйкера. Карціна выйграла пяць намінацый з шасці — «найлепшы фільм», «найлепшая актрыса» (Майкі Мэдысан), «найлепшы рэжысёр», «найлепшы сцэнарый» і «найлепшы мантаж», што дазволіла Бэйкеру паўтарыць рэкорд Уолта Дыснэя па колькасці ўзнагарод, атрыманых за адзін вечар.
Галоўная гераіня фільма — 23-гадовая стрыптызёрка Анора Міхеева з Брукліна. Яна імпульсіўна выходзіць замуж за Ваню Захарава, сына расійскага алігарха, якому некалькі разоў аказвае інтымныя паслугі. Пасля некалькіх сустрэч і паездкі ў Лас-Вегас, маладыя людзі таемна бяруць шлюб. Бацькі жаніха не ўхваляюць такі няроўны саюз і гатовыя зрабіць усё, каб яго ануляваць, што прыводзіць да шэрагу драматычных і камедыйных сітуацый.
Па словах рэжысёра Шона Бэйкера, на стварэнне «Аноры» яго натхніла гісторыя сябра пра расійска-амерыканскую пару, якая як толькі ажанілася, трапіла ў сітуацыю з выкраданнем — жаніха быццам узялі ў заклад для выплаты даўгоў.
Бэйкер сцвярджае, што ягоная мэта — распавядаць «чалавечыя гісторыі», якія будуць мець універсальны змест. «Анорай» ён хоча дапамагчы зняць стыгму з сэкс-працы, бо гэтая сфера традыцыйна выклікае шмат негатыўных стэрэатыпаў.
Для большага разумення гэтай тэмы рэжысёр наняў творчай кансультанткай Андрэю Вэрхун — канадскую пісьменніцу і актрысу, вядомую сваім мемуарамі «Modern Whore» («Сучасная шл*ха»), дзе яна расказвае пра свой уласны досвед у сэкс-індустрыі.
Выканаўца галоўнай ролі Майкі Мэдысан спецыяльна вучыла рускую мову, асвойвала бруклінскі акцэнт і наведвала стрып-клубы, каб пераканаўча ўвасобіць вобраз Ані.
Здымкі праходзілі на рэальных лакацыях у Нью-Ёрку (паўднёвы Бруклін) і Лас-Вегасе. Рэжысёр нават знайшоў сапраўдны асабняк алігарха праз пошук у Google («найбуйнейшы асабняк Брайтан-Біч»), дзе здымаў сцэны ў доме сям’і Захаравых.
У карціне зняўся цэлы шэраг расійскіх акцёраў. Сярод іх Юрый Барысаў, які стаў першым расійскім акцёрам, намінаваным на «Оскар», але прэмія за найлепшую мужчынскую ролю другога плана дасталася іншаму.
Барысаў многім запомніўся па расійскім фільме «Капітан Ваўканогаў уцёк», дзе сыграў галоўную ролю. Там расказваецца гісторыя капітана НКВД, чый аддзел у поўным складзе аказваецца там жа, дзе і іх ахвяры.
У фільме зняліся і дзве беларускі. Адна з іх — Марыя Жак. Яна скончыла журфак БДУ і акцёрскія курсы Стэлы Адлер. Беларуска сыграла эпізадычную ролю хостэс Таццяны, піша тэлеграм-канал «Кавалачак жыцця».
Другая беларуская актрыса — Марыя Тычынская. Яна выканала ролю Дашы, адной з дзяўчат, якая тусуецца з Іванам (Марк Эдэльштейн). Дзяўчына жыве ў ЗША дзевяць гадоў і з'яўляецца прадпрымальніцай — у яе ёсць уласнае агенцтва па брэндзінгу, звяртае ўвагу канал «Свяшчэнны Белавуд».
Дарэчы, бацькі Юрыя Барысава таксама маюць беларускія карані.
Шлях да галоўнай кінапрэміі свету «Анора» пачала ў мінулым годзе. Яе прэм'ера адбылася на 77-м Канскім кінафестывалі, дзе фільм атрымаў галоўны прыз — «Залатую пальмавую галінку».
Фільм быў высока ацэнены крытыкамі па ўсім свеце. Так, на вядомым амерыканскім агрэгатары рэцэнзій Rotten Tomatoes яго рэйтынг складае 93% (пры сярэдняй адзнацы 8,5 з 10). Іншы аўтарытэтны рэсурс, Metacritic, дзе зводзяцца меркаванні журналістаў і разлічваецца сярэдняя ацэнка, прысвоіў фільму 91 бал са 100. На французскім сайце AlloCiné «Анора» атрымала сярэднюю ацэнку 4,2 з 5 на падставе 45 рэцэнзій крытыкаў краіны.
«Анора» трапіла ў спісы «самых прыкметных фільмаў года» адразу ў некалькіх уплывовых кінакрытыкаў, а некаторыя нават назвалі яе «новай класікай незалежнага кіно».
Разам з тым у часткі аўдыторыі ўзніклі змешаныя пачуцці з-за ўдзелу ў праекце акцёраў з Расіі. Сцэнарыст Міхаіл Ідаў у газеце The New York Times напісаў:
«Хоць «Анора» зусім не выглядае чымсьці настолькі недарэчным, каб яе можна было лічыць прарасійскай ці антырасійскай, яе оскараўскія намінацыі, асабліва за найлепшую мужчынскую ролю другога плана для Юрыя Барысава, у Расіі падаюць як нацыянальную перамогу. І гэта ставіць мяне ў выключна няёмкае становішча: атрымліваецца, што, радуючыся поспеху фільма, я міжволі апынаюся ў адной кампаніі з даволі сумнеўнымі асобамі».
Пры бюджэце ў шэсць мільёнаў даляраў, у пракаце «Анора» ўжо сабрала 41 мільён.
Цяпер чытаюць
Мінчук абурыўся кантынгентам у сталічным метро: Усе з новымі айфонамі, але не могуць дазволіць сабе танную машыну ці паездкі на таксі?20
Каментары